Nesër pritet të rifillojë veprimtaria e shërbimeve gjyqësore në të gjitha gjykatat në Republikën e Shqipërisë. Të gjendur në këtë situatë karantine, qytetarët mund të pyesin si do të paraqiten ata në gjykata kur lëvizja lejohet vetëm me autorizim?
KLGJ-ja sqaroi se qytetarët mund të paraqiten në gjykatë vetëm nëse kanë një çështje të ngutshme, kur diçka e tillë u është komunikuar prej personelit të gjykatës. Nëse nuk u kanë kontaktuar nga gjykata, komunikoni me gjykatën nëpërmjet telefonit/postës elektronike (e-mail), përpara se të paraqiteni fizikisht pranë saj.
Këshilli i Lartë Gjyqësor gjithashtu u kërkoi gjykatave zbatimin në mënyrë rigoroze të masave të caktuara nga Ministria e Shëndetësisë për parandalimin e përhapjes së Covid-19. “Në këto masa përfshihen dezinfektimi, pastrimi i rregullt, mbajtja e distancës prej 2 metrash midis të gjithë individëve në gjykatë, si midis personelit gjyqësor, ashtu edhe përdoruesve të gjykatës, marrja e masave për pajisjet mbrojtëse personale, si maska, doreza, etj. Në lidhje me këto, Këshilli po përgatit rregulla të hollësishme”.
Megjithatë KLGJ-ja thekson se seancat gjyqësore të çështjeve administrative, civile dhe penale të një natyre jo të ngutshme vazhdojnë të jenë të pezulluara në të gjitha gjykatat. Afatet për ngritjen e padive, për paraqitjen e ankimeve si dhe për kryerjen e çdo veprimi procedural në çështjet administrative, civile dhe penale të një natyre jo të ngutshme vazhdojnë të jenë të pezulluara.
