Pas ditës së djeshme kur ishin të lejuar të dilnin vetëm të moshuarit, ditën e sotme janë lejuar të dalin deri në orën 11:00, nënat me fëmijët deri në 10 vjeç.
Megjithëse ky ka qenë një urdhër i prerë i qeverisë për të dalë në kryeqytet vetëm kjo kategori, nga videot dhe pamjet e siguruara nga Fjala.al, Liqeni Artificial dhe qendrat e Tiranës janë mbushur nga qytetarë të ndryshëm të kryeqytetit, duke bërë që ata të mos respektojnë masat dhe këshillat e dhënë nga Ministria e Shëndetësisë për të mos përhapur dhe mos u infektuar nga koronvirusi.
Sipas udhëzimeve të kreut të qeverisë nënat duhet të mos shoqërohen me persona të tjerë dhe fëmijët duhet të mbahen larg çdo kontakti me fëmijë të tjerë.
“Nesër gratë dhe fëmijët deri në 10 vjeç mund të dalin lirisht deri në orën 11.00. Ne burrat punë shtëpie dhe kontribut në gatim mundësisht”, u shpreh dje Rama.
Por, në fakt ditën e sotme ka ndodhur komplet e kundërta, ku grup-mosha të ndryshme kanë mbushur mjediset e Liqenit Artificial në Tiranë. Ata shihen të grupuar dhe shumë afër njëri-tjetrit, veçanërisht në pjesën e digës së Liqenit duke mos respektuar as distancimin social, duke rritur rrezikun e përhapjes së koronavirusit.
Nga ana tjetër duket se policia është treguar tolerante ditën e sotme kësaj situate.
