Analisti Fatos Lubonja ka ngritur dyshime sa i përket përbërjes së atij që quhet Këshilli Teknik dhe që, sipas kryeministrit, ka hartuar dhe po ndjek strategjinë e luftës me koronavirusin.
Në studion e ‘News 24’, Lubonja theksoi se askush nuk e njeh përbërjen e Këshillit Teknik dhe se kush është kryetari i tij. “Mos ndoshta këta janë hije të Ramës?”, pyeti analisti.
Lubonja kritikoi edhe mjekun e Spitalit Infektiv, Pëllumb Pipero, për të cilin tha se ka ndjekur të njëjtën linjë me qeverinë.
“Këtu nuk ka një mendim ndryshe. Edhe Trump-it po i dalin shkenctarët kundra për gjera të caktuar, ndërsa këtu na flasin të gjithë në unison. Edhe ai Pipero që e nxjerrin shpesh, edhe ai sipas linjës së qeverisë ka folur. Jo thotë, nuk ka nevojë për shumë teste dhe mundohet të shpjegojë atë kurbën, ndërkohë që OBSH thotë sa më shumë teste”, u shpreh Lubonja.
Fatos Lubonja bëri thirrje që të publikohen emrat e anëtarëve të Këshillit Teknik, të cilët, sipas kryeministrit, po marrin masat për të gjithë shqiptarët.
