Kryeministri Edi Rama gjatë një komunikate drejtëpërdrejtë në Facebook tha se ditën e premte pritet të arrihet një vendim për përfshirjen në zonën e gjelbër edhe qytete të tjera, por përjashtoi Tiranën të cilën e quajti një zonë delikate.
“Ka disa zona të tjera që mendojmë se i plotësojnë kriteret. Tirana në këtë moment mbetet zonë delikate dhe për këtë arsye nuk përfshihet. Deri ditën e premte do të kemi një konkluzion dhe do të lajmërojmë për zona të tjera të gjelbërta”,- tha Rama.
Rama vuri edhe një herë në dukje se masat e marra në Shqipëri nuk janë shumë ndryshe nga ato të vendeve fqinje, për shëmbull Greqia e cila ka marrë masa lehtësuese, nuk lejon lëvizjen nga periferia në prefekturë.
Kreu i qeverisë tha se pas datës 11 maj mund të ketë një lehtësim lidhur me karantinimin e domosdoshëm në hotele.
“Dëgjoj vërejtet e disave dhe më duket sikur nuk jetojnë në këtë planet. Faktikisht është e gjithë bota kështu. Masat e lehtësuara në Greqi nuk e lejojnë lëvizjen nga prefektura në prefekturë. Të bëjmë durim, të shohim që procesi po vazhdon dhe jemi të suksesshëm në frontin me armikun e përbashkët, e gjithë sakrifica mund të zhbëhet nëse hapemi për një javë pa kujdes.
Deri pas kësaj jave dhe javën në vijim ne do të bëjmë një analizë të thellë, do ballafaqohemi edhe me komitetin për hapjen e mëtejshme të koridoreve tokësore dhe ajrore. Në 11 maj do kemi lehtësim në raport me domosdoshmërinë e karantinimit në hotel. Në javën e ardhshme do shikojmë të gjithë elementët”,- shtoi ai./Fjala.al
