Që prej datës 9 mars nxënësit dhe studentët në të gjithë vendin iu nënshtruan një eksperimenti shkollor për shkak të pandemisë së koronavirusit, duke lënë bankat e shkollave dhe auditoret për të vijuar shkollimin nëpërmjet telefonave e kompjuterave. Po sa i drejtë ishte vendimi i ministrisë së Arsimit për moshapjen e shkollave dhe a ka funksionuar mësimi online? Flasin për gazetën Fjala Rigels Xhemollari, drejtor ekzekutiv i organizatës Qendresa Qytetare dhe Ardi Stefa, mësues dhe ekspert arsimi. Ministria: “U kushtëzuam nga situata me koronavirusin”.
Nga Blerina Gjoka
Zhurma e zërave të fëmijëve në oborrin e shkollës, ulja në bankat prej druri, dërrasa e zezë, shkumësi dhe imazhi hijerëndë dhe i dashur i mësuesit/es janë një imazh i së shkuarës së afërt. E tashmja na ofron fëmijë të ulur pas një telefoni smart apo një kompjuteri në një klasë virtuale e cila mund të fshihet nga ekrani në çast nëse nuk ka lidhje interneti. E ardhmja nuk dihet se çfarë imazhi do të na sjellë për shkollën, por duket se ajo nuk do t’i ngjajë më asaj që kemi njohur. Pandemia e koronavirusit ka detyruar shkollat në të gjithë botën që të mbyllin dyert për nxënësit e tyre. Që prej datës 9 mars edhe në Shqipëri janë mbyllur të gjitha shkollat dhe universitetet, duke u futur disa ditë më vonë në një sistem mësimi online. Shkolla virtuale, një koncept i ri për Shqipërinë i papraktikuar më parë, i gjeti të papërgatitur mësuesit dhe nxënësit duke eksperimentuar me rrjete sociale krijimin e klasave virtuale në platforma të ndryshme, apo dërgimin e testeve e detyrave dhe vlerësimin e tyre nëpërmjet aplikacionit ëhatsapp. Çdo nxënësi nga klasa e parë u duhej të posedonin një telefon ose kompjuter dhe të kishin akses në internet për të bërë mësimin online, ndërkohë që e gjithë përgjegjësia për frekuentimin e mësimit apo shpjegimin e koncepteve të reja binte mbi prindërit.
Kur pritej që të lajmërohej plani i hapjes graduale të shkollave që po praktikohet në vendet europiane të prekur nga pandemia e koronavirusit, më 27 prill, Ministria e Arsimit vendosi mbajtjen e dyerve të shkollave mbyllur të paktën deri në vjeshtë, duke e deklaruar mbylljen e vitit shkollor nëpërmjet mësimit virtual deri në fund të muajit maj. Në një prononcim për gazetën “Fjala” përfaqësues të Ministrisë së Arsimit thanë se: “Grupi i punës i përbërë nga ekspoertët më të mirë të arsimit vendosën që të mos hapen shkollat për shkak të situatës me koronavirusin, por ky vendim kurrsesi nuk prek nxënësit në rezultate, pasi do të njihen të gjithë notat e marra nga secili nxënës deri më datë 9 mars”-thuhet në reagim, madje, shtojnë burimet zyrtare, “Mund të ketë rritje notash nga vlerësimi i mësimit online sipas vlerësimit që kanë bërë mësuesit”. Provimet e klasës së 5 dhe 9 nuk do të kryhen, vetëm maturantët do të kenë mundësi të zhvillojnë provimin e përfundimit të sistemit parauniversitar. Ministrja Besa Shahini tha se nxënësit do të vlerësoheshin për vitin shkollor sipas notave që kanë pasur në regjistër deri më datën 9 mars kur u mbyll shkolla, duke pranuar në një farë mënyre “dështimin e shkollës virtuale” të kësaj periudhe.
Gjithashtu ajo u la në dorë prindërve që të vendosin për përsëritjen e vitit shkollor për fëmijët e tyre nëse nuk janë të kënaqur me vlerësimet për fëmijët. Pra, shkolla do të quhet e vlefshme në letra për këtë vit, por në fakt nuk e ka arritur synimin e saj. Prindërit prisnin që shkolla të hapej gradualisht duke ofruar siguri për distancë sociale, klasa me pak nxënës dhe plotësimin e kushteve të higjienës në shkolla, por kjo nuk ndodhi. Burime nga Ministria e Arsimit i thanë gazetës Fjala se “vendimi për moshapjen e shkollave ishte i kushtëzuar nga kushtet në të cilat ndodhen aktualisht shkollat me klasat të tejmbushura me nxënës dhe disa prej tyre zhvillojnë mësimin me turne për shkak të mbingarkesës”. Pra, ishte e vështirë të siguronte distancimin social si masë parandaluese për mospërhapjen e virusit. Po ashtu burimet pranuan se “nuk mund të merreshin për bazë vlerësimet e bëra gjatë kohës së mësimit online për shkak të problematikave të shumta dhe mungesës së frekuentimit rigoroz nga nxënësit”.
Sa i drejtë ishte vendimi i Ministrisë së Arsimit për moshapjen e shkollave dhe a ka funksionuar mësimi online? Flasin për gazetën “FJALA” Rigels Xhemollari, drejtor ekzekutiv i organizatës “Qendresa Qytetare” dhe Ardi Stefa, mësues dhe ekspert arsimi.
