Përmes një deklarate shpërndarë për mediat këtë të premte, Joe Biden ka mohuar çdo akuzë të ngritur ndaj tij për abuzim seksual, një ngjarje të ndodhur 27 vite më parë.
Letra nis me fjalët: “Ajo çka pretendon Tara Reade nuk ka ndodhur kurrë”.
Kjo është përgjigja e parë zyrtare e kandidatit në garën presidenciale të nëntorit në Shtetet e Bashkuara të Amerikës teksa presioni në rradhët e demokratëve sa vinte e rritej, për të patur një reagim.
“Teksa këto detaje për ngacmim dhe sulm seksual vijojnë të publikohen, dua të them se dy gjëra nuk janë të plota. Një është që gratë meritojnë të trajtohen me dinjitet dhe respekt dhe çdo hap më tutje që ato duhet të dëgjojnë, nuk duhet të mbeten sekret. E dyta është që historitë e tyre duhet të jenë subjekt i hetimeve të duhura”, shpjegon ish zv.presidenti dhe kandidati i demokratëve në garë për zgjedhjet e nëntorit.
“Por ka një mosrakordim. Ajo thotë se disa prej këtyre shqetësimeve i ka ngritur edhe me supervizorin e saj dhe stafin tim në atë kohë. Ata, të dy burra dhe një grua, kanë thënë, se kurrë ajo nuk është shprehur për këtë gjë, as nuk është shqetësuar dhe as nuk është ankuar. Mediat janë përpjekur të gjejnë lidhjet me ish-pjestarët e stafit tim dhe nuk kanë gjetur asnjë, as edhe një te vetëm që të jetë në dijeni të këtyre akuzave. Përkundrazi, ata kanë folur për kulturën që ne kishim në zyrë, dhe kurrë nuk është toleruar asnjë lloj ngacmimi, sikurse as unë”, shkruan më tej Biden.
Edhe në një intervistë për rrjetin amerikan MSNBC, Biden theksoi se kjo ngjarje nuk ka ndodhur kurrë. Ai shpjegoi gjithashtu se këto ditë nuk është përpjekur të kontaktojë me Reade dhe as nuk kujton që ajo të jetë ankuar ndonjëherë për ndonjë sjellje të pahijshme pasi kjo gjë nuk ka ndodhur.
Akuzat vijnë në moment kur Biden po përgatitet në fushatën kundër presidentit aktual Donald Trump në zgjedhjet e përgjithshme presidenciale. Më shumë se dhjetë gra kanë akuzuar publikisht z.Trump për ngacmime seksuale, para fushatës së tij në 2016 por edhe pasi u zgjodh president, por gjithnjë kreu i shtëpisë së bardhë i ka mohuar akuzat.
Demokratët vitet e fundit kanë mbështetur vazhdimisht lëvizjen MeeToo, kundër ngacmimeve seksuale ndaj vajzave dhe grave. Tara Reade, e cila ka punuar në stafin e Joe Biden në vitin 1993, e ka akuzuar atë publikisht vitin e shkuar se e ka prekur në shpatulla dhe qafë dhe e ka bërë të ndihet keq. Reade i bëri publike akuzat pasi kishte ngritur më herët një padi për ngacmim seksual ndaj tij.
Ngjarja sipas saj ka ndodhur në korridoret e Capitol Hill, kur Biden, teksa fliste me të në një rast, i ka vendosur gjurin në mes të këmbëve dhe më pas e ka prekur në pjesët intime. Miqtë dhe fqinjët e saj kanë vërtetuar këto ditë në mediat amerikane, fjalët e saj ndërsa hetimet vijojnë.
Akuzat shtojnë presionin në garën e demokratëve, në qoftë se kjo histori cënon apo jo integritetin e kandidatit për postin e presidentit të ardhshëm të Shteteve të Bashkuara. Hetimet për çështjen mund të zgjasin deri në verën e vitit 2021./Burimi: CNN Përshtati: Fjala.al
