Iten është një qytet në Qarkun Elgeyo-Marakwet në Republikën e Kenias, shërben si kryeqytet i qarkut dhe është vendosur përgjatë rrugës midis Eldoret dhe Kabarnet në kryqëzimin e rrugës që shkon drejt Kapsowar.
Nëse këto fjalë ju duken paksa abstrakte, kuptojeni që jemi në zemër të Afrikës, në “Shtëpinë e kampionëve” ku prej javësh stërvitet edhe simboli i sportit shqiptar Luiza Gega.
Vajza që “garon” me erën, zgjodhi një lartësi prej 2400 metrash mbi nivelin e detit, një ushqim të ndryshëm dhe përgatitje të denjë, për të qenë në formë për aktivitetet, edhe pse anulimi i Lojërave të Tokios, e ka pezamtuar jo pak. Ajo rrëfen për gazetën Fjala, edhe kalvarin e saj në tokën keniane.
“Ndodhem në Iten, në Kenia dhe ndodhem këtu që nga 16 Marsi e sigurisht ardhja ime këtu kishte objektiv Lojërat e Tokios, por që u anuluan një javë pas ardhjes time këtu. Fillimisht nuk e prita mirë duke qenë që erdha këtu për tu përgatitur në një situatë të vështirë, faza e dimrit hkoi shumë mirë dhe isha optimiste. Gjithsesi nga ana tjetër mendoj ishte vendim i drejtë pasi bota po kalon situatë të vështirë nga pandemia, dhe këtu në Kenia, është vështirë. Stadiumet dhe palestrat këtu janë mbyllur dhe stërvitjet i kryej në rrugë apo pjesën e forcës në vendin ku qëndroj”, thotë Luiza Gega për Fjala.al
Por kjo nuk e ka privuar atë të stërvitet çdo ditë. Klima në Iten, “Home of Champions” (kështu e kanë pagëzuar atletët elitarë) është shumë e mirë.
“Fluturimet u anuluan dhe vazhdojnë të jenë dhe ende nuk kam një datë se kur do kthehem. Bileta ime e kthimit është djegur. Prisja dhe kampionatin Europian 2020 në Paris, por situata aktuale bën që të shtyhet. U anulua aktiviteti i dytë më i rëndësishëm për mua këtë vit” thotë sportistja shqiptare pa e humbur buzëqeshjen, atë buzëqeshje që i ka dhuruar mijëra shqiptarëve kur ka shkëlqyer si askush në pistat anembanë globit.
https://youtu.be/5imX-l4Db7s
“Ende nuk dimë kur mund të garojmë në aktivitete të tjera si Diamond League sepse ende nuk kemi një kalendar. Në Kenia, veç stërvitjes nuk ka gjëra të mira për të bërë këtu. Si sportiste e distancës së mesme dhe të gjatë, shumë nuk e dinë që seancat duhet t’i bëj në lartësi në mungesë të madhe oksigjeni në lartësi si këtu mbi 2400 m, për të rritur parametrat biologjikë. Nuk është lehtë kjo periudhë për mua, larg familjes dhe për më tepër pa objektiva të mëdhenj por shpresoj kjo situatë do mbarojë”, thotë Luiza./Fjala/
