Manchester United po përgatit një plan ekstrem për të rikuperuar miliona euro humbje për shkak të goditjes nga pandemia, e ky përfshin dhe parashikimin për të mos patur asnjë tifoz në stadium deri në vitin 2021.
“Djajtë e Kuq” që po synojnë të rikthehen me ndeshjet e Premier league në fundin e këtij muaji, po konsiderojnë një skenar të denjë për “Doom’s day”, praktikisht asnjë tifoz në shkallët e “Teatrit të Ëndrrave” për 6 muaj pasi futbolli të ketë marrë lejen që të rikthehet në fushën e blertë.
Lojtarët do të duhet të përshtaten me situata të çuditshme e madje ka nga ata që pretendojnë vendosjen e altoparlantëve në impiantin “Old trafford” për të imituar koret e tifozëve dhe ovacionet. Shumë njerëz në Angli e kuptojnë se me situatën e krijuar nga coronavirus, stadiume me kapacitet 75 mijë persona nuk do hapen të paktën deri në 2021, kur të jetë në qarkullim një vaksinë potenciale.
“Parashikimi për të parë stadiumet e Premier League plot, nuk do të ndodhë në një të ardhme të afërt dhe klubet e dinë këtë. Do të ishte e pakujdesshme që skuadrat të mos e buxhetonin këtë parashikim e bashkë me të, humbjet e mëdha” tha një burim i FA, për “Mirror”./Fjala.al/
