Presidenti i Federatës shqiptare të Futbollit nuk i ka dhënë ende “dum” punëve të shtëpisë, por në spektrin europian mundohet disi të japë qartësi në mjegullën që ka rrethuar futbollin për shkak të pandemisë. Armand Duka, presidenti i FSHF tha për radion “Kiss Kiss” të Napolit se faza finale e Ligës së Kampioneve do të jetë e gjitha në Stamboll.
Sigurisht Duka nuk “shpiku rrotën” pasi kjo gjë ishte përmendur më parë në UEFA, madje më herët presidenti i Federatës turke zbuloi dhe 29 gushtin si dfatën e finales së Champions në Stamboll. por kreu i FSHF, insiston se faza finale do të jetë në “Ataturk Olympic Stadium”.
“Ekziston mundësia që Champions League 2019/20 të ketë dy ndeshje gjysmëfinale në Stamboll, përveç finales së madhe. PSG do luajë ndeshjet e tij në Champions, njësoj si dhe Lyon. Për ndeshjet e tjera po mendohet dhe ende nuk është vendosur. Mund të ketë një sfidë direkte….” tha Armand Duka.
Nuk i fshehu Duka, as përplasjet me qeverinë shqiptare. “Po presim një përgjigje se kur mund të rinisim stërvitjet e kur të luajmë. Kemi stiluar një protokoll dhe presim këtë javë një përgjigje pozitive. Vende të tjera mund të ndjekin të njëjtën linjë. Në Shqipëri kemi të njëjtat përplasje me qeverinë, si federata italiane. Duam të rifillojmë pasi nuk jemi rrezik dhe kemi argumentet tona” tha Duka. Fjala.al
