Kujtim Spahiu, njëri nga 4 policët e arrestuar dhe proceduar për skandalin e lirimit të kosovarit Gashi, është dënuar nga gjykata e Lezhës. I hiqet e drejta për funksione publike për tre vite.
Lirimi nga ambientet e komisariatit të Kukësit të Naser Gashit, kosovarit të dënuar me 7.4 vite burg për trafik droge, ka sjellë dënimin e njërit prej policëve që i hapi derën, duke e lënë të lirë.
Gashi ishte në kërkim nga Policia e Shtetit, por megjithëse ai u arrestua në pikën kufitare nën emrin e rremë Saimir Bula, ai kurrë nuk u verifikua për dënimin në Shqipëri dhe kërkimin e tij. Efektivi i policisë Kujtim Spahiu që besohet se i hapi derën dhe nxori nga qelitë e komisariatit të Kukësit, Naser Gashin, është dënuar dje nga gjykata e Lezhës me 2 vjet e 8 muaj burgim. Njëherësh me këtë dënim, gjykata ka urdhëruar që efektivit të policisë Spahiu t’i hiqet e drejta për të mbajtur funksione publike për një periudhë 3 vjeçare.
Me këtë vendim përmbyllet dhe historia e skandalit të ndodhur në fund të vitit 2018 në Komisariatin e Policisë Kukës, ku një i kërkuar nga drejtësia shqiptare edhe pse u arrestua, sërish u la i lirë, duke sjellë përplasje mes drejtuesve të Komisariatit Kukës dhe Drejtorisë së Policisë Kukës.
Skandali i nxjerrjes nga qelia të trafikantit Gashi, madje edhe duke i kthyer pasaportën dhe kartën e identitetit kosovare të falsifikuar me emrin “Saimir Buli”, bëri “kurban” në fillim të 2019 zv/drejtorin e hetimit në Drejtorinë e Kukësit, Shkëlqim Pepkolaj, i cili u pezullua nga detyra, duke u vënë në procedim disiplinor. Por pas hetimeve prokuroria lëshoi urdhër-arrestet, për drejtuesit e komisariatit të Kukësit, Agim Basha, i cili në atë periudhë, ju fsheh drejtësisë.
Për këtë çështje fillimisht u arrestuan nga Prokuroria e Krimeve të Rënda dhe dy efektivë të tjerë të policisë Kukës, Shkëlzen Ibaj dhe Ferdinand Gjeta, të cilët më pas u liruan nga gjykata. Çështja kaloi për hetime të mëtejshme në prokurorinë e Lezhës, e cila vendosi të pushojë hetimet për tre zyrtarët e komisariatit të Kukësit dhe të kalojë çështjen për gjykim me një të pandehur, policin e thjeshtë Kujtim Spahiu.
Ky i fundit dje u dënua me 2.8 vite burgim. Ndërkohë ende dhe sot i liruari Naser Gashi është në listën e personave në kërkim të publikuar nga Policia e Shtetit. Dënimin e ai e ka marrë nga gjyqtarja Nertina Kosova më 21 shkurt 2013 ku është deklaruar fajtor dhe dënuar me 7 vite e 4 muaj burg për trafik droge, vendim i lënë në fuqi edhe nga apeli i Krimeve të Rënda.
