Plot 8 njerëz do ti drejtohen Gjykatës së Lartë në Londër për të kërkuar dëmshpërblim dhe ndjesë publike ndaj Manchester City, në vazhdën e abuzimeve seksuale me lojtarë të mitur, të cilët frekuentonin shkollën e futbollit në vitet ’80 dhe ’90.
Nën akuzë mbi të gjithë përfundoi Barry Bennell që asokohe bashkëpunonte me klubin si zbulues talentesh dhe stërviste skuadrat satelit. Në 2018 Bennell u dënua me 30 vjet burgim për abuzimin e të paktën 50 futbollistëve nga 1979 deri në 1991, por skandali nuk mbyllet me kaq.
Tani akuzuesit, që janë burra mbi 50 vjeç, ankohen për dëme të pariparueshme psikiatrike edhe pse Bennel nuk ishte zyrtarisht punonjës i Manchester City. 8 ish futbollistët kërkojnë dëme për mundësinë e mohuar për të vazhduar karrierën në futboll si pasojë e abuzimeve. Procesi pritet të nisë në tetor 2021, ndërsa më parë, skuadra e Manchester City ka aprovuar një fond për të dëmshpërblyer viktimat e abuzimeve.
