Artistët dhe aktivistët e Aleancës për Mbrojtjen e Teatrit janë përplasur ditën e sotme me Policinë Bashkiake.
Ata kanë pasur një sërë debatesh, pasi sipas artistëve policia ka kërkuar që të futet në godinën e Teatrit dhe të ekzekutojë Vendimin e Këshillit të Ministrave, që i ka dhënë truallin e teatrin në pronësi bashkisë.
Pasi kanë hasur me rezistencën e personave që prej rreth dy vitesh mbrojnë Teatrin policët kanë lënë një dokument në derën e objektit dhe kërkojnë që të marrin në dorëzim godinën, pasi tashmë është pronë e Bashkisë Tiranë.
“Në bazë të vendimit nr 15 3037 /1 të datës 12,.5 2020 për marrjen në dorëzim të pasurisë 1/ 241 ZK 5380, Teatri Kombëtar Inspektori Elton Dermishi, prezent edhe inspektori Kujtim Llapaj”-shkruhet në shkresën e vendosur në derën e TK-së.
Ndërsa aktivistët u kanë bërë thirrje qytetarëve të Tiranës që të shkojnë te Teatri, pasi policia po kërkon që të futet në ndërtesë.
Kjo përplasje ka ardhur disa ditë pasi Këshilli i Ministrave ka marrë vendimin që truallin e Teatrit Kombëtar ta kalojë në pronë të Bashkisë Tiranë. Ndërsa në vendimin që është publikuar në Fletoren Zyrtare, thuhet se i jepet mundësi bashkisë që të ndërtojë godinën e re me standarde e kushte bashkohore./Fjala.al/
