Operacioni Forca e Ligjit godet në Tiranë. Mëngjesin e sotëm ajo i ka dërguar formularin tre personave të dënuar për vepra të ndryshme penale të cilët kanë një afat 48-orësh për t’u përgjigjur.
Bëhet fjalë për Fatjon Manabej, Denis Qordja (Dervishi) dhe Shkëlqim Sharrën.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
Shkëlqim Sharra akuzohet se në bashkëpunim me 34-vjeçaren F.P., banuese në Gramsh, gjatë periudhës Dhjetor 2014-Janar 2015 kanë tentuar të trafikojnë dhe shfrytëzojnë për prostitucion në Itali shtetasen B.B., 23-vjeçe, banuese në Cërrik.
Për kalimin e të resë jashtë Shqipërisë, Sharra ka tentuar t’i japë ryshfet një punonjëse policie në portin e Durrësit.
Po ashtu Sharra rezulton i dënuar edhe më parë me 12 vjet burg për veprën penale të vrasjes, si dhe me precedentë për drogë.
Ndërkohë Manabej, rezulton i dënuar në vitin 2007 nga Gjykata e Aleksandrisë në Itali me 5 vjet e 3 muaj burg, për veprat penale “Pjesëmarrje në organizatë kriminale”, “Rrëmbim personi”, “Grabitje me armë” dhe “Përvetësim i pasurisë së vjedhur”.
Sakaq Qordja, i cili njihet edhe si Denis Dervishi rezulton i dënuar për shfrytëzim prostitucioni. Një biznes i madh i ngritur prej tij në zonën e Petrelës, ka bërë që të vihet në “sitën” e OFL.
