Drejtoresha e Agjencisë Kombëtare të Shoqërisë së Informacionit, Mirlinda Karcanaj, gjatë mbledhjes së zhvilluar me kryeministrin Edi Rama dhe kreun e ALUIZNI-t, Artan Lamen, për Kadastrën ka shpjeguar sesi mund të kryhet aplikimi online lehtë dhe shpejt.
Karcanaj shpjegoi duke demonstruar si mund të bëhet aplikimi online për certifikatë pronësie.
“Në E-Albania për pronat janë bërë 40 mijë aplikimi vetëm në 2 muajt e fundit. Aplikimi mund të bëhet online dhe pagesa mund të bëhet me një kartë krediti. Vendosim të dhënat e kartës së kreditit dhe aplikimi është gati.
Ky veprim reflektohet në kohë reale në Kadastër. Pagesa bëhet me sukses dhe konfirmohet nga institucioni. Tek dokumentet e mia ndodhet tashmë aplikimi i kryer.”-tha Karcanaj.
Ndërsa, Rama iu përgjigj duke thënë se u arrit që dokumentet e pronësisë të merren lehtë siç ishte thënë.
“Kur kemi thënë se do të bëjmë të mundur që dokumentet e pronësisë merren lehtë me një aplikim, nuk na kanë besuar. Sot jemi në një kohë të transformimit të madh në shërbime.”-u shpreh kreu i qeverisë./Fjala.al/
