Në dalje të Elbasanit, në rrethrrotullimin e Bradasheshit, policia ka ngritur postbllok për të ndaluar lëvizjen e automjeteve drejt Tiranës. Ky vendim po shkakton kaos në rrugë, me dhjetëra automjete që po qëndrojnë të bllokuara prej ditësh.
Qëndrimi zyrtar i autoriteteve është se Tirana konsiderohet ende zonë e kuqe për shkak të pandemisë së koronavirusit, ndaj ndalohen hyrje-daljet. Por shumë prej qytetarëve të bllokuar pretendojnë se kanë qarkulluar gjatë këtyre ditëve në drejtim të kryeqytet pa asnjë pengesë. Ata pretendojnë se masa ekstreme e vendosur sot nga Policia lidhet me protestën e paralajmëruar në orën 16.30, kundër shembjes së godinës së Teatrit Kombëtar.
