Ministria e Shëndetësisë nuk e raportoi si “vdekje nga COVID-19. Efektivi V. K që humbi jetën dje është një nga 30 policët që kanë qenë bartës të koronavirusit
Nga Blerina Gjoka
Një punonjës i policisë së Tiranës, i infektuar me koronavirus, ndërroi jetë dje në spitalin e Kardiologjisë. Efektivi Valmir Kasiqi, 49 vjeç, ka qëndruar prej disa ditësh në Spitalin Infektiv si mbartës i virusit COVID-19, por ka dalë prej spitalit duke u konsideruar i shëruar nga mjekët, raporton Fjala.al. Vetëm 3 ditë pasi ka lënë infektivin, mësohet se ai ka shfaqur probleme me zemrën dhe është transferuar urgjent në Spitalin e Kardiologjisë, ku dhe ka humbur jetën.
Ai ishte punonjës në zyrën e Informacionit në Drejtorinë e Policisë së Tiranës dhe dyshohet se u infektua me koronavirus për shkak të pozicionit të punës, ndërsa ka qenë në kontakt me dhjetëra kolegë e qytetarë gjatë kulmit të periudhës së epidemisë në vendin tonë.
Ndonëse në kartelën e vdekjes është shënuar “arrest kardiak”, shkaku, sipas specialistëve mjekë, që i nxiti probleme me zemrën lidhet pikërisht me kalimin e një situate të rëndë nga infektimi me COVID-19.
Është një nga 30 efektivët e Policisë së Shtetit të cilët sado që morën masa, nuk mundën që të shmangnin përballjen me sëmundjen që gjunjëzoi edhe vendet më të zhvilluara. Punonjësit e policisë ishin dhe janë ende në radhë të parë të përballjes dhe në rrezik të vazhdueshëm për infektim. Madje, janë të riskuar po aq sa mjekët, që në fillim të pandemisë u gjendën të papërgatitur edhe për mënyrën se si duhet të ndiqnin protokollet strikte me pacientët e dyshuar si të prekur.
Mjekët që kurojnë të infektuarit me koronavirus kanë vënë disa herë në dukje se kjo është një sëmundje që godet organet jetike te njeriu, dhe ka pasur edhe raste të tjera ku pacientët kanë rezultuar negativë, duke besuar se e kanë lënë pas sëmundjen, por kanë humbur jetën më vonë nga ataku kardiak apo shkaqe të tjera.
Edhe në një rast tjetër në Shqipëri u raportua që një grua që kishte lënë pas sëmundjen COVID-19 humbi jetën nga arresti kardiak, njësoj siç ndodhi me efektivin 49-vjeçar. Rasti në fjalë mund të ishte mbajtur më në kontroll, pasi menjherë pasi ka rezultuar negativ pas trajtimit në Spitalin Infektiv, mendohet se nuk i është bërë kontroll për probleme të tjera që si shkak nxitës kishin pikërisht koronavirusin. Ai është dërguar në shtëpi dhe vetëm pas tri ditësh qëndrim në banesë është dërguar në gjendje disi të rënduar dhe fatkeqësisht dje ka ndërruar jetë./Fjala.al
Shpërndarja gjeografike e rasteve aktive është si vijon:
Tiranë 68
Krujë 35
Durrës 31
Shkodër 14
Kamëz 10
Berat 10
Fier 4
Elbasan 2
Mirditë 1
Korçë 1
COVID-19 – Statistika
Testime totale 12899
Raste pozitive 949
Raste të shëruara 742
Raste aktive 176
Humbje jete 31 (Qarku Tiranë 18, Durrës 6, Fier 3, Vlorë 1, Shkodër 2, Kukës 1)
