Situata në Mal të Zi vijon të jetë e tensionuar për shkak të përpjekjeve të Podgoricës për të ndarë Kishën Ortodokse nga ndikimi i Kishës Ortodokse Serbe. Beogradi ka kritikuar vendimin e Qeverisë malazeze dhe e sheh këtë përpjekje si goditje të komunitetit serb që jeton në Mal të Zi.
Serbët përbëjnë gati 29% të popullisë prej 631 mijë banorë të Malit të Zi, ndërsa Aleksandar Vuçiç duket se po kërkon shtimin e tensioneve në vendin fqinj.
Pas takimit që zhvilloi me Patriarkun Irinej, Vuçic tha tha se qëllimi i autoriteteve malazeze është që “serbët të zhduken nga Mali i Zi brenda një dekade”, por paralajmëroi se nuk do të lejohet një “Stuhi” tjetër, referuar betejës së vitit 1995 në Kroaci, kur shumë serbë u dëbuan nga vendi.
“Për sa kohë situata në Mal të Zi është shqetësuese, ne e kuptojnë qëndrimin e Kishës Ortodokse Serbe. Duhet të jemi më të kujdesshëm sepse nuk duam të bëjmë atë çfarë na bën neve”, tha Vuçiç duke shtuar se qëllimi i tij nuk është të ndërhyjë në punët e brendshme të Mali të Zi, ashtu si ky i fundit bëri kur njohu pavarësinë e Kosovës.
Serbia po sheh me shqetësim daljen e Mali të Zi nga sfera e saj e influencës. Vendi i vogël ballkanik që shpalli pavarësinë nga Serbia në vitin 2006, u anëtarësua në NATO në vitin 2017-të, ndërkohë që në vitin 2016 u shmang një grusht shteti i orkestruar nga rusët për të bërë mundur pikërisht bllokimin e anëtarësimit të Malit të Zi në aleancën ushtarake Perëndimore.
