Presidenti Ilir Meta ka vendosur të kthejë në Kuvend ligjin për shtesën e kontratës koncesionare për portin në Porto Romano të Durrësit.
Meta sqaron edhe arsyet e mos-dekretimit të ligjit, i cili u kundërshtua nga Kuvend edhe nga dy ish-ministrat, Ditmir Bushati dhe Ilir Beqaj. Edhe Partia Demokratike reagoi ashpër për koncesionin PPP, duke akuzuar se oligarkët dhe krimi i organizuar do të kishin në Shqipëri portin e tyre privat.
Sipas Metës:
– Procedurat e ndjekura nga autoriteti kontraktor Ministria e Infrastrukturës dhe Energjisë kanë anashkaluar procedurat e konkurrimit të parashikuara në ligjin nr. 125/2013 “Për koncesionet dhe partneritetin publik privat”, të ndryshuar, ku përmes negocimit të drejtpërdrejtë janë cenuar njëkohësisht dhe parimet kushtetuese të barazisë përpara ligjit dhe lirisë së veprimtarisë ekonomike;
– Marrëveshja shtesë Koncesionare ka krijuar një marrëdhënie të re kontraktuale të negociuar dhe nënshkruar, në shkelje edhe të parimeve dhe parashikimeve të parashikuara në Kodin Detar të Republikës së Shqipërisë dhe ligjin nr. 125/2013 “’Për koncesionet dhe partneritetin publik privat’”, të ndryshuar”;
– Përmes shkeljeve të mësipërme është cenuar hierarkia e akteve normative në Republikën e Shqipërisë, sanksionuar në nenin 116 të Kushtetutës;
– Praktikisht nën procedurën e një marrëveshje shtesë, është dhënë një e drejtë koncesionare e re, jashtë objektit kryesor të koncesionit që gëzon sot kompania koncesionare, e cila kërkonte detyrimisht që Autoriteti Kontraktor të ndiqte të gjitha procedurat e ligjit nr. 125/2013, për konkurrim të hapur dhe transparent.
