Njeriu që humbi nënën e tij në Barcelonë për shkak të pandemisë së coronavirus, tani ka një afeksion edhe më të madh për mjekët dhe stafin shëndetësor. Trajneri i Manchester Cityt, Pep Guardiola, ka dhënë një intervistë me të vërtetë prekëse, duke distancuar botën e futbollit nga termi special.
Numri një i “Citizens” konsiderohet gjerësisht si trajneri më i mirë në botë, por kjo gjë sipas tij, vlen zero, pasi ata që janë me të vërtetë më të mirët, janë doktorët, infermierët, shkencëtarët dhe të gjithë ata që rrezikojnë jetën e tyre për të mbrojtur tonat.
“Futbollistët mezi presin të rikthehen, pasi ajo është jeta e tyre. Po ndjekim atë çfarë na kanë udhëzuar, rregullat, protokollin që na është dhënë. Duhet t’i ndjekim, nuk ka alternativë tjetër. Kjo është gjëja kryesore, të bëjmë gjithçka çfarë kemi në dorë që ta luftojmë këtë virus. Kam kuptuar se ne trajnerët, futbollistët, nuk jemi specialë: Njerëz specialë janë doktorët, infermierët, shkencëtarët, pastrueset. Ata vendosin jetët e tyre në rrezik për të shpëtuar tonat”, tha Guardiola.
