Fundi i sezonit në futbollin italian, nëse do të ketë një të tillë për shkak të problemeve nga pandemia, do të sjellë si dhuratë plot 10 milionë euro për Lazio. Kjo është shuma e alokuar nga presidenti Claudio Lotito për fitoren eventuale të titullit kampion në Serie A, nëse kryeqytetasit do triumfojnë në sfidën që nuk prisnin ndaj Juventus.
Presidenti Lotito dhe drejtori sportiv, shqiptari Igli Tare kanë menduar të stimulojnë javët e mbetura për bardhekaltërit. Parashikohet të jenë rreth 400 mijë Euro për çdo lojtar për një sezon që tashmë duket se është interesant dhe vendos Lazio pretendente për titullin që nuk fshihet më.
Aktualisht Lazio, e cila është e dyta në renditje, pas Juventus, ka siguruar një vend në Ligën e Kampionëve, por “tringjyrëshi” për armatën e Simone Inzaghi, do përfaqësonte një arritje të pamendueshme në Gusht.
Lotito ka komunikuar me skuadrën për t’u dhënë atyre bonusin për fitoren përfundimtare të kampionatit. Tani ai pret 3 qershor kur kapiteni Lulic do të rikthehet. Vetëm pas kësaj gjithçka do të depozitohet në Ligën italiane ashtu siç kërkohet nga ligji për shpërblimet.
