NASA dhe kompania private e raketave SpaceX e sipërmarrësit miliarder Elon Musk kanë bërë histori pasi ia kanë dalë të nisin me sukses në orbitë dy amerikanë nga Florida mbrëmjen e së shtunës.
Ky është misioni i parë hapësinor i astronautëve të NASA-s nga toka amerikane në nëntë vitet e fundit. Një raketë e SpaceX Falcon 9 u ngrit nga Qendra Hapësinore Kennedy në orën lokale 3:22 duke nisur drejt hapësirës astronautët Doug Hurley dhe Bob Behnken.
Udhëtimi do të zgjasë 19 orë dhe do të shkojë në Stacionin Ndërkombëtar Hapësinor.
Hera e fundit që NASA nisi astronautë drejt hapësirës me një mjet të ri fluturimi ishte 40 vite më parë në fillim të programit hapësinor.
Lidhur me këtë ngjarje historike ka reaguar dhe Presidenti Donald Trump, i cili deklaron se partneriteti midis NASA dhe SpaceX i ka dhënë Amerikës “një fuqi të pakrahasueshme”.
“Tani e tutje SHBA do të përdorë aftësitë në rritje të shpejtë të sektorit tonë komercial. Ne do të përdorim raketa dhe anije kozmike të projektuara, të ndërtuara, në pronësi dhe të nisura nga kompani private amerikane me një çmim fiks për taksapaguesit amerikan. Nisja e sotme e raketës e bën të qartë se industria komerciale e hapësirës është e ardhmja” ka thënë Trump.
Presidenti i Shteteve të Bashkuara ka shtuar se kur ai filloi detyrën si president, NASA kishte “humbur rrugën”.
“Ju nuk mund të jeni numri një në Tokë nëse jeni numri dy në Hapësirë. Dhe ne nuk do të jemi numri dy askund” thotë Trump./E.B./Fjala.al
