Numri i lejeve të ndërtimit e nisi me rënie edhe vitin 2020. Mbështetur në të dhënat e Institutit të Statistikave, në tremujorin e parë u dhanë 184 leje ndërtimi, në rënie me 25%, krahasuar me të njëjtën periudhë të vitit të kaluar.
Rënia e numrit të lejeve është një tendencë që nisi që prej gjysmës së dytë të vitit të kaluar dhe që u theksua edhe më shumë në tremujorin e fundit, edhe për shkak të pezullimit të përkohshëm nga tërmeti i nëntorit.
Sipas INSTAT-it, vitin e kaluar numri i lejeve të ndërtimit pësoi rënie me 13%.
Sipas INSTAT-it numri i lejeve dominohet nga ndërtimet rezidenciale, kryesisht me më pak se dy kate, por tendenca e ndërtimeve të reja prej vitesh është pozitive edhe në sektorin e biznesit.
Investimi në pasuri të paluajtshme vitet e fundit duket të jetë në rritje, mbështetur nga një përmirësim gradual i rritjes ekonomike, por edhe nga normat e ulëta të interesit të kredisë bankare.
Indeksi i çmimit të banesave që llogaritet me frekuencë 6-mujore nga Banka e Shqipërisë, tregoi se në gjysmën e dytë të vitit 2019 çmimet mesatare të banesave në Tiranë u rritën me pothuajse 15%./Fjala.al
