Ministri i Brendshëm, Sandër Lleshaj ka mbrojtur edhe një herë tjetër veprimet e policisë gjatë shembjes së godinës së Teatrit Kombëtar. Duke e konsideruar të ligjshëm vendimin e bashkisë së Tiranës për shembjen e godinës, Lleshaj tha se policia e ka për detyrë që të përgjigjet në të tilla raste, ndonëse vet nuk është palë.
“Policia nuk shkoi me iniciativën e saj, por iu përgjigj detyrimit të saj ligjor, siç i përgjigjet me mijëra thirrjeve në ditë në të gjithë Shqipërinë. Policia ka për detyrë t’i përgjigjet thirrjeve nga kushdo qoftë, aq më pak kur vijnë nga institucione. Policia nuk shkoi si palë, por si autoritetet ligjzbatues për të zbatuar një vendim të ligjshëm. Policia në Shqipëri nuk e ka luksin që t’i bëjë vetë ligjet, por t’i zbatojë ato në mënyrë konsekuente dhe pa interpretime.
Policia ishte para dy zgjedhjeve: Ose të shkonte dhe t’i përgjigjej kërkesës së bashkisë për mbështetje, ose ta refuzonte atë. Pra të zbatonte detyrimin ligjor ose ta braktiste atë. Zgjodhi të zbatojë detyrimin ligjor”, tha Lleshaj.
Gjatë interpelancës në Kuvend, Lleshaj akuzoi protestuesit se kishin penguar policinë në kryerjen e detyrës.
“Policia u pengua me forcë për të ushtruar detyrën e saj nga persona që mbanin të zaptuar godinën, ashtu si nga persona që tentuan të thyejnë kordonin e sigurisë”, tha ministri.
