Ditën e nesërme zhvillohet testi i parë për maturantët. Ministrja e Arsimit, Besa Shahini nëpërmjet një statusi u ka uruar suksese të gjithë maturantëve.
“Arritëm ta mbyllim këtë vit të vështirë shkollor, falë qëndrueshmërisë së nxënësve, durimit të prindërve dhe përkushtimit të jashtëzakonshëm të mësuesve tanë që brenda një kohë të shkurtër e përballën me sukses realitetin e krijuar nga tërmeti shkatërrues dhe pandemia vdekjeprurëse. Mirënjohje të veçantë për secilin prej jush! ? Tashmë jemi në atë “fazën finale të maratonës” për maturantët tanë, të cilët ditën e nesërme kanë provimin e parë të Maturës Shtetërore. Suksese të përzemërta secilit prej tyre në çdo provim dhe i dëshiroj gjithë të mirat në rrugëtimin e tyre jetësor”, shkruan Shahini.
Maturantët kanë zhvilluar konsultime për provimet e maturës që prej 17 majit. Ministrja Shahini ka theksuar më herët, se në provimet e maturës nuk do të ketë pyetje nga orët mësimore të zhvilluara online./Fjala.al/k.l
