Një kampion që zbriti në vendet e fundit, kjo është historia e Partizanit në sezonin 2019-2020. Të kuqtë e kryeqytetit janë duke kaluar në një prej periudhave më të këqija të tyre, pasi kanë shënuar vetëm humbje të njëpasnjëshme.
Duket se ky Partizan nuk ka asnjë lidhje me atë të sezonit të kaluar. Ndërsa në kampionatin 2018-2019 pamë një skuadër të pathyeshme me një sulm që e kishin zili të gjithë, ku treshja Bardhi, Asani dhe Mala shënon pothuajse në çdo takim, ku sezon po tregon një ekip krejt tjetër.
Mbajtja larg fushës prej disa muajsh e Esat Malës, duke ndarë treshen e shumë komentuar, si dhe largimi i Jasir Asanit në janar, kohë kur u huazua te skuadra e AIK Stockholm duket se kanë pasur goxha ndikim.
Megjithatë duhet theksuar se impakti kryesor e ka pasur trajneri i ekipit. Skënder Gega mundi që sezonin e kaluar të sillte një Partizan të pathyeshëm, shumë ndryshe nga ky që pamë sot në ndeshjen kundër Kukësit.
Kryeqytetasit u mundën me rezultatin 1-3, duke u rrëzuar kështu në vend të 8-të, me 38 pikë gjithsej, të Kategorisë Superiore. Ndonëse duket se mundësitë e rrëzimit nga elita e futbollit shqiptar janë të pakta,të kuqtë kanë humbur shumë nga ky sezon.
Partizani nuk ka asnjë mundësi tashmë jo vetëm për titullin e kualifikimin në Champions League, pro edhe për të hyrë në Europa League.
Partizani në njëfarë mënyrë mund të thuhet se nuk rrezikon, por në të njëjtën kohë është i humbur.
Kundërshtarët e tyre të përjetshëm nga ana tjetër, Tirana është duke shijuar periudhën e saj ‘të artë’. Bardheblutë e kryeqytetit kanë shumë kohë tashmë që nuk njohin asnjë humbje. Ata arritën që të fitonin bindshëm ndaj Luftëtarit, të cilëve iu shënuan plot 5 gola dhe mbajtën të paprekur portën bardheblu./Fjala.al/Katerina Tafa/
