Kryeministri Edi Rama i është përgjigjur Partisë Demokratike në lidhje me kundërshtimet që kishin për Eurobondin dhe ka thënë se flasin si balonë tabake, pa bisht dhe e shkëputur nga realiteti.
Gjatë një konference për mediat, Rama shtoi se në kohën kur PD-ja ishte në pushtet, shifrat nuk ishin me të.
Më tej ai theksoi se borxhi vërtet është marrë, por shteti shqiptar ka fituar besueshmërinë në tregje.
“Kemi dalë me prim zero. Më vjen keq që flitet në mënyrë të ngjashme me fluturimin e balonave tabake pa bisht, nuk e di, kur ishim fëmijë kishim pasion balonat. Balonat tabake ishin më të bukura dhe më bindëse balonat tauke. Balonat tabake kishin skelet simetrik, por kur s’kishin bisht, nuk fluturonin dot. PD tamam në formën e një balone tabake, flet për një gëzim pse morëm borxh. Ndërkohë që duhet të hidhëroheshim. Krejt e kundërta është e vërtetë.
Ne kemi marrë një konfirmim nga tregjet, që në radhë të parë na bën një vend të besueshëm, në radhë të dytë na jep mundësinë të zgjerojmë bazën tonë të financimit të ekonomisë dhe të investimit, ndaj thashë është një bazë që konsolidon planin tonë të ri kombëtar, Shqipëria 2030. Do të kujtoj vetëm një detaj, që ministrat mund t’a shtjellojnë më mirë. Kur vendi del në tregun e kapitaleve, kur qeverisnin ata që flasin sot, ka ndodhur që gjatë procesit të daljes në treg, hyri për 7 dhe doli me 11. Atyre që thonë ‘Hë mo se borxh morët’, ju kujtoj se nuk mjafton të duash të marrësh borxh, dhe se ata që japin borxhe duhet besim, dhe besimi varet mbi librat e llogarive.”-tha Rama.ka.ta/Fjala.al/
