“Nota është një numër, por dita e sotme është një kujtim që duhet ta fshij nga kujtesa” shkruan në përfundim të komentit të tij një nga maturantët pas testit të Gjuhës Shqipe dhe Letërsisë që u zhvillua dje.
Ndoshta me të drejtë shumëkush do të thoshte se maturantët ankohen kot, se janë streset e moshës, por kur shikon reagimet e shumta në rrjetet sociale dhe disa nga pyetjet e provimit, thua se maturantët kanë një farë të drejte.
Një nga maturantët që ka reaguar është dhe Kristi Dushku, djali i historianes Ledia Dushku. Në Facebook-un e saj Ledia ka ri-postuar komentin e të birit duke shtuar së është krenare për të.
“Pyetjet mu dukën shumë abstrakte, alternativat tejet të përafërta. Zgjidhja e tyre kërkon një përqendrim të lartë. Por a mund të jemi ne në rendimentin maksimal pas tërmetit, pas pandemisë?,” shkuan mes të tjerash Kristi duke shprehur pakënaqësinë për testin.
“Më mërziti paaftësia e hartuesve të testit dhe mbi të gjitha mungesa e mirëkuptimit prej tyre të situatës sonë. E sotmja ishte një nëpërkëmbje e punës sonë dhe mësuesve tanë,” komenton më tej maturanti duke theksuar se Ministria e Arsimit nuk është treguar e kuptueshme.
Mes të tjerave Kristi shkruan se modeli i testit “provë” që u hartua nga QSHA-ja nuk kishte asnjë lidhje ma provimin që ata zhvilluan dje.
Deri tani nuk kemi asnjë reagim nga Ministria e Arsimit lidhur me testin që u zhvillua dje. l.m/Fjala.al
