Maturantët kanë dalë sërish sot të protestojnë për shkak të pakënaqësive të krijuara nga provimi i Gjuhë-Letërsisë, për të cilin kanë deklaruar se nuk ka qenë sipas udhëzimeve.
Maturantët po protestojnë para Ministrisë së Arsimit Sportit dhe Rinisë duke kërkuar rivlerësim të testit dhe uljen e kufirit për notën 9 dhe 10.
Maturantët kanë bllokuar sot rrugën dhe shprehen të vendosur që t’i shkojnë deri në fund protestës së tyre.
“Nuk u është përgjigjur kërkesave tona. Kërkesat tona nuk janë marrë në shqyrtim. Kërkesat tona nuk janë lexuar, drafti ynë është lënë mënjanë. Ne do protestojmë derisa ai draft të shkojë në dorë të sigurt dhe ta lexojnë dhe ta shqyrtojnë ekspertë të fushës.
Përsa i përket maturantëve nuk do ishte e denjë sepse na shtypim me eksperiencën e tyre. Por tryeza e tyre do zhvillohet me dyer të hapura. Nëse do futemi në provimin e matematikës ose jo, gjithçka varet nga protesta e sotme”, shprehet një maturant.
Ndërsa një maturante tjetër tha se kërkesat e tyre nuk janë marrë parasysh nga Komiteti i Maturës Shtetërore. Sipas saj, notat që do dalin nga testi i Gjuhës Shqipe dhe Letërsisë duhet të hidhet poshta.
“Ajo çka ne po kuptojmë është që na kërkuan një draft, ne e bëmë draftin, ua plotësuam kërkesat që ata kishin me përpikmëri dhe sërish e hodhën poshtë draftin. Ne sot ndihemi edhe më shumë të fyer. Kërkesat tona nuk janë marrë parasush. Ajo notë nuk është e vlefshme as për mua dhe as për maturantët e tjerë”, tha ajo.
Dje maturantët dorëzuan në MAS draftin me të gjitha problematikat që ata mendojnë se kishte testi i Gjuhës Shqipe dhe Letërsisë, duke sjellë edhe pyetje konkrete, të cilat janë pakuptimta dhe thuajse të pamundura për t’iu përshtatur një alternativë./Bl.Ba/Fjala.al
