Ndarja nga jeta e shkrimtarit, akademikut dhe personazhit të njohur të kulturës Moikom Zeqo, shkaktoi hidhërim të madh.
Duke e ditur se sëmundja nga e cila vuante prej disa vitesh, leucemia akute, nuk i linte shpëtim, i ndjeri kishte lënë edhe amanetet e fundit.
Ai kishte kërkuar që të varrosej në Tiranë dhe kishte kërkuar që homazhet në nder të tij të mbaheshin tek Muzeu Historik.
Kjo pasi ky institucion u drejtua prej tij nga viti 1997 deri në vitin 2005. Por homazhet mund të shtyhen për në fundjavë, kjo pasi i biri ndodhet në Amerikë.
Me vendim të familjes, Moikom Zeqo nuk do të përcillet në banesën e fundit, pa iu dhënë lamtumira nga djali dhe shtyrja e homazheve do të ndodhë, në pritje që i biri të ketë mundësi të vijë në Shqipëri.
Ndarja nga jeta e Mojkom Zeqos është një humbje e madhe për kulturën dhe botën e letrave shqipe, Ai do të mbetet një zë i veçantë dhe me vlera në fondin, identitetin dhe trashëgiminë e kulturës shqiptare./Bl.Ba/Fjala.al
