Ashtu siç edhe paralajmëruan, maturantët i janë rikthyer protestave pas përfundimit të testit të Matematikës ditën e sotme.
Ata vazhdojnë me këmbënguljen se teza e Gjuhës Shqipe dhe Letërsisë ishte jashtë pritshmërive dhe paralajmërimeve të Ministrisë së Arsimit dhe kërkojnë rishikim e pikëve.
Ndërsa porsa i përket tezës së Matematikës, maturantët thanë se nuk kanë ankesa, pasi ishte i lehtë ndryshe nga ai i Gjuhës Shqipe dhe Letërsisë.
‘Arsyeja pse kemi dalë është përsëri ankesa për Letërsinë. Nuk kam ankesa për provimin e Matematikës. Lajm pozitiv ai i KOMSH, por përgjigja nga Ministria ishte e pakënaqshme. Prandaj vijojmë protestën për të mbrojtur të drejtat tona.’-u shpreh një maturant.
Ndërsa një tjetër tha se do vazhdohet me protestat, pasi ai i Gjuhës Shqipe dhe Letërsisë sipas tyre ishte abstrakt.
‘I matematikës ishte i thjeshtë, jo i vështirë si i Letërsisë. Kam dalë për provimin e Letërsisë pasi nuk më duket i drejtë. Nuk është çështja të rishikohen vetëm pikët por teza ishte abstrakte. Pyetje që kishin paqartësi. Alternativat ishin sinonime të njëra- tjetrës. Relativisht mirë kisha dalë por nuk bindem me atë skemë .’-tha maturantja.ka.ta/Fjala.al/
