Denoncohet shtrirja e koronavirusit edhe në Kryeministri. Ish-deputeti demokrat Bardh Spahia, denoncon se rastet po mbahen të fshehta.
“Çfarë ndodh kur Covid-i shfaqet edhe në Kryeministri? Natyrisht nuk thuhet, por fajësohen qytetarët “e pabindur”, që nuk zbatojnë rregullat e distancimit social. 28 nga 82 rastet e shpallura ditën e sotme i takojnë Tiranës dhe ajo që nuk thuhet është se raste janë shfaqur edhe në Kryeministri, e për pasojë aty do ketë tamponim të gjerë gjatë ditës së sotme”, shkruan Spahia.
Ai pyet se si shpjegohet që protokollet e sigurisë nuk respektohen në institucionin më të lartë ekzekutiv të vendit, aty nga ku lëshohen kërcënimet me gjoba e burg për qytetarët?
Në vijim shton se “Kush e ka përgjegjësinë për këtë?” Spahia i bën thirrje Kryeministrit Rama që të lërë planet e errëta për të justifikuar zgjatje të gjendjes së fatkeqësisë natyrore, por të shohë se çfarë ndodh në institucionin që drejton.
“Është modeli më i shëmtuar që mund t’u japësh qytetarëve të cilët para pak ditësh i kërcënove me rimbyllje! Dështim total”, deklaron Spahia./Bl.Ba/Fjala.al
