IKMT-ja së bashku me Policinë e Shtetit kanë vijuar aksionet për shembjen e ndërtesave në bregdet. Plot 11 objekte pa leje janë shembur ditën e sotme në Dhërmi, ndërsa nga policia bëhet me dije se ndaj pronarëve abuzivë janë marrë masa administrative.
Ky lajm u bë publik në një njoftim për mediat ku shtohet se ky aksion do të shtrihet në gjithë bregdetin dhe kudo ku ka ndërtime pa leje.
Njoftimi IKMT:
IKMT, në bashkëpunim me Policinë e Shtetit, ushtruan kontrolle në plazhe e hapësira publike në bazë të planit të masave të hartuara enkas për sezonin turistik veror. Gjatë kësaj jave është verifikuar linja e bregdetit në Dhërmi ku u konstatuan 11 ndërtime pa leje, të ngritura në kundërshtim edhe me rregullat teknike, pasi ishin vendosur në rërë.
Ndaj këtyre objekteve është ndërhyrë me mjete duke i prishur, ndërsa ndaj pronarëve abuzivë janë marrë masa administrative dhe kryer veprimet procedurale për ndërtime në kundërshtim me ligjin. IKMT dhe Policia e Shtetit vijon punën evidentimin dhe parandalimin e shkatërrimit të mjedisit qoftë përmes ndërtimeve pa leje, ashtu edhe me hedhje inertesh. Ky aksion do të shtrihet në gjithë bregdetin dhe kudo ku ka ndërtime pa leje. Policia e Shtetit dhe IKMT fton çdo qytetar të denoncojë shkeljet në numrin falas 112 ose përmes Komisariatit Dixhital.ka.ta/Fjala.al/
