Kryeministri Edi Rama reagon lidhur me situatën e mbetjeve në qytetin e Durrësit. Ai thotë se nuk do të ketë hedhje plehrash në asnjë zonë të bashkisë në këtë fazë tranzicioni.
“Në vend që ta dizinformojnë publikun dhe të keqpërdorin shqetësimin qytetar, për audiencë dhe për të nxitur shfaqjet e pakënaqësisë që ushqehet me lajme të rreme, mediat duhet t’u thonë durrsakëve se s’do të ketë hedhje plehrash në asnjë zonë të bashkisë në këtë fazë tranzicioni”, shkruan kreu i qeverisë në Twitter
Ky reagim vjen pasi prej ditësh Durrësi po vuan nga mungesa e një vendgrumbullimi për mbetjet urbane.
Më 11 qershor Këshilli Bashkiak i Durrësit në një mbledhje të jashtëzakonshme, vendosi që të shpallë gjendjen e emergjencës mjedisore.
Vendimi u mor pas mbylljes së vend-depozitimit të mbetjeve në Porto-Romano.
Ky vendim vjen pasi rrugët e qytetit bregdetar janë mbushur me plehra, për shkak të mbylljes së vend-grumbullimit.
Zona e Porto-Romanos ku mblidheshin plehrat, sipas planit të qeverisë do të bëhet park urban ekologjik./Bl.Ba/Fjala.al
