3 mijë pagesat e para grante për Rindërtimin si dhe 200 dosjet e para në zonat rurale, miratohen sot nga Këshilli Bashkiak i Tiranës.
Kryebashkiaku i Tiranës Erion Veliaj deklaron se pagesat e miratuara sot do të fillojnë të jepen javën e ardhshme.
“Sot janë 3 mijë familje të kategorive DS1, DS2 dhe DS3 që marrin pagesat cash. Do të vazhdojmë kështu, nga 3 mijë në çdo mbledhje, që t’i afrohemi sa më shpejt shifrës së 10 mijë dosjeve, të gjitha nga tërmeti i nëntorit. Kemi gati edhe 200 dosjet e para për shtëpitë që do të rindërtohen, kryesisht në zonat rurale. Nuk bëhet fjalë për pallatet, por për shtëpitë private familjare. Me këtë lot hapen disa kantiere pune në shumë prej zonave rurale të Tiranës, për të filluar në kohë rekord edhe ndërtimin e shtëpive. Për 200 dosjet e shtëpive të reja do të procedohet me një kontratë me operatorin që do ta ndërtojë. Sigurisht, kontrata na lipset pasi të marrim çelësat në dorë, që të kemi mundësi ta hipotekojmë. Për të gjithë këto procedura, çdo njësi administrative do të informojë qytetarët që përfitojnë nga procesi i rindërtimit”, deklaroi kryebashkiaku Veliaj.
Ndërkohë Veliaj shtoi se do të shëmben 41 pallate në Tiranë, kryesisht në zonat e Kombinatit dhe Kinostudios, pasi sipas tij nuk janë të sigurta për jetesën e banorëve./Fjala.al/Ke.Ba
