Qyteti i bukur juglindor i Korçës, i quajtur ndryshe Parisi i vogël i Shqipërisë, është njohur gjithmonë për vlerat e shumëllojshme historike-kulturore dhe kulinare, që e kanë shndërruar në një destinacion të preferuar për shumë njerëz.
Dhe duke qenë një qytet kaq i çmuar dhe me tradita, vendalinjtë dinë t’ia shfrytëzojnë më mirë këto vlera dhe t’ia nxjerrin në pah.
Ish-ministri i Bujqësisë dhe deputeti socialist, Niko Peleshi, njihet për pasionin e tij për kitarën dhe serenatat korçare, të cilat i këndon me gjithë shpirt.
Në aktivitetet e ndryshme që zhvillohen në Korçë, por edhe thjesht për qejf me miqtë, Peleshi dhe kitara janë miq të pandarë. Madje, nga fotot që ish-ministri poston në rrjete sociale, të krijohet ideja që Peleshi është shpirti i festës, shkruan “panoramaplus”.
Dhe nëse është kështu, në këtë rast atij i përshtatet një shprehje e njohur: “Non Niko, non party”. Në politikë, Peleshi ka rënë në sy gjithmonë për një qetësi dhe qytetari në mënyrën e sjelljes, tipike e zonës nga vjen. Me sa duket, të gjithë adrenalinën ai e ruan për serenata dhe për të luajtur në kitarë./Bl.Ba/Fjala.al
