Franca ishte vendi i parë që mori një vendim ekstrem për të mbyllur kampionatin e futbollit para kohe, por tani pas krizës së madhe të pandemisë, po ndryshon qëndrim. Stadiumet në Francë do të hapen për tifozët që nga 11 korriku.
Vendi transalpin po lehtëson masat e përballjes me COVID-19, ndërsa qeveria dha dritën jeshile dhe për sportin më popullor në planet. Maksimalisht pesë mijë shikues do të lejohen në arenat anembanë vendit duke respektuar distancimet sociale dhe protokollin e sigurisë. Ky kufizim mund të lehtësohet më vonë në verë. Kampionati i ri në Francë pritet të fillojë më 22 gusht.
Edhe finalet e Kupës së Francës dhe Kupës së Ligës tani mund të luhen me shikues në stadiume. Edicioni 20192020 i Ligue 1 të Francës zyrtarisht u anulua më 30 prill, ndërsa PSG-ja u shpall kampione. Ligue 1 është e vetmja prej pesë ligave të mëdha evropiane të futbollit që ka anuluar edicionin, një veprim që ngjalli protesta të mëdha, sidomos nga skuadra që u lanë jashtë kupave Europiane, si Lyon.
