Borussia Dortmund ka siguruar firmën me adoleshentin shumë të vlerësuar të Birmingham, Jude Bellingham, një prej futbollistëve me të ardhme premtuese dhe nga më të kërkuarit në merkaton që ende nuk ka nisur. Klubi i Bundesligës pritet të njoftojë marrëveshjen në ditët e ardhshme, me Dortmundin që duket se ka mbyllur akordin për rreth 20 milionë Euro.
Manchester United ishte prej muajsh në ndjekje të talentit dhe shumë pranë për të nënshkruar me 16-vjeçarin. Red Devils madje e ftuan Jude Bellingham për një turne rreth bazës së tyre të stërvitjes, por duket se ka qenë pa vlerë.
Një mori klubesh elitare evropiane ishin gjithashtu të interesuar ta joshnin Jude Bellingham, por siç raportohet nga ESPN, i riu ka zgjedhur Dortmundin. Bellingham nuk do të jetë në gjendje të firmosë një marrëveshje profesionale derisa të mbushë 17 vjeç, kohë që do të jetë në 29 qershor.
Ai aktualisht po fiton vetëm 145 Paund në javë në Birmingham, por raportohet se i është dorëzuar një ofertë prej 60,000 Paundësh në javë në klubin e tij të ri. Diferencën gjykojeni vetë…
