Seanca e sotme e Kuvendit të Shqipërisë, që filloi me një orë vonesë për shkak të mbledhjes së grupit parlamentar të PS-së ka nisur me një akuzë të fortë nga ana e deputetit të opozitës Halit Valteri.
“Ky është parlamenti i Shqipërisë dhe jo selia e PS-së. Seanca ka filluar në 11:00, ndërkohë që duhet të niste në 10:00. Nëse këta nuk kanë kohë të mblidhen 2 orë para për pazarin që po bëni me Metën për t’i dhënë KLSH-në nuk është faji ynë apo i shqiptarëve.
Ju për një minutë i hiqni fjalën deputeteve dhe një orë dhunohet Kuvendi se ka mbledhje PS-ja, në emër të grupit ju kërkojmë të mos përsëriten më këto situata”, u shpreh Halit Valteri.
Në përgjigje të kësaj vërejtjeje, ka reaguar kreu i Kuvendit, Gramoz Ruçi, duke thënë se një gjë e tillë nuk do të përsëritet më.
“Nuk do përsëritet më, e thashë edhe në nisje të seancës. Është e drejtë ekskluzive e çdo grupi parlamentar të kërkojë ndërprerje e seancës deri në një orë, por nuk ishte ky rasti, nuk do përsëritet më”, tha Ruçi.
