Nga mbishkrimet raciste deri te promovimet e humbura, punonjësit thonë se kompania po përshkohet nga një “model sistematik i paragjykimit racor”.
Javën e kaluar, Jeff Bezos, shefi ekzekutiv i Amazon-it, shkroi një shënim të rrallë për të gjithë punonjësit e kompanisë. Ekipi drejtues kishte reflektuar mbi “racizmin sistemik” me të cilin përballeshin komunitetet me ngjyrë , tha ai, dhe u bëri thirrje punonjësve të marrin kohë për të mësuar dhe reflektuar në kuadër të Juneteenth, festë që shënon fundin e skllavërisë në Shtetet e Bashkuara.
“Unë po anuloj të gjitha takimet e mia të premten, dhe ju inkurajoj të bëni të njëjtën gjë, nëse mundeni”, tha Bezos.
Por disa prej punonjësve të Amazon-it u shprehën se kishte një problem të madh me sugjerimin e tij. Për shumicën dërrmuese të punëtorëve me ngjyrë, anulimi i një takimi nuk është një opsion. Ata punojnë në Amazon në paketim, transportim dhe dërgim të produkteve drejt një numri të lartë konsumatorësh. Dhe në kompani, Juneteenth njihet si dita kur punëtorët inkurajohen të vishen me të zeza.
“Çfarë bën një këmishë e zezë për këdo për sa i përket drejtësisë shoqërore?” – tha Adrienne Williams, një drejtuese me ngjyrë e mjeteve të Amazon në zonën Bay. Më mirë t’i mëshojnë pagesës, tha ajo, do të bënte shumë më tepër punë.
“Kjo do të zvogëlojë gjendjen para-ekzistuese që është varfëria”, shtoi Williams.
Shumë punonjës dhe kontraktues po argumentojnë se Amazon, një nga punëdhënësit më të mëdhenj të Shteteve të Bashkuara, duhet të bëjë shumë më tepër për të adresuar pabarazinë racore brenda mureve.
Thirrjet për ndryshim, përfshirë diversifikimin e radhëve të saj të larta dhe adresimin e racizmit në depot e saj, kanë krijuar një shkallë të pazakontë trazirash brenda gjigantit të teknologjisë. Edhe biznese të tjera të mëdha përballen me thirrje për ndryshime nga brenda.
Por Amazon qëndron larg, sepse ka një përqindje të madhe të punonjësve me ngjyrë – më shumë se një e katërta e forcës së saj të punës, 500 mijë persona, të cilët fitojnë shumë më pak sesa homologët e tyre të korporatës.
Kjo përqindje është pak më e lartë se në mesin e punonjësve të Walmart në SHBA, dhe shumë më e lartë se në kompanitë e tjera të mëdha të teknologjisë. Për shembull, në Facebook, njerëzit me ngjyrë përbëjnë më pak se 4 për qind të forcës së saj të punës.
Dhe pak drejtues kanë mbështetur publikisht lëvizjen “Black Lives Matter” si Jeff Bezos, personi më i pasur në botë. Bezos postoi në rrjetin social Instagram mesazhe shqetësuese që ai kishte marrë në përgjigje të qëndrimit të tij për barazi raciale, duke përfshirë një e-mail nga një person i quajtur Dave, i cili përdorte ikona raciste dhe shprehej se nuk do të bënte më biznes me Amazon-in.
Dave, shkroi Bezos, ju jeni lloji i klientit që jam i lumtur që humba. Johnnie Corina III, e cila javën e kaluar ngriti një ankesë për diskriminim, duke e akuzuar Amazon-in se nxiste një mjedis armiqësor për punonjësit me ngjyrë, tha se e kishte të pamundur t’i merrte për të mirëqena deklaratat e Bezos.
Një zëdhënës i Amazon-it, Jaci Anderson, deklaroi se kompania tregoi solidaritet ndaj komunitetit me ngjyrë, dhe se ajo ishte “e përkushtuar për të ndihmuar në ndërtimin e një vendi dhe një bote, ku të gjithë mund të jetojnë me dinjitet dhe pa frikë.” Anderson gjithashtu tha se punonjësit kishin qenë të lirë të pushonin për të marrë pjesë në organizimet për Juneteenth.
“Ne e respektojmë dhe inkurajojmë zgjedhjen e tyre për ta bërë këtë”, tha ajo. Këtë muaj, kompania tha se do të ndalonte përkohësisht shitjen e softuerit të tij të njohjes së fytyrës, fill pasi u konstatua nga studiuesit se njerëzit me ngjyrë po keqidentifikohen përmes tyre.
Kritikët e Amazon-it, përfshirë disa punonjës, thonë se edhe ky ishte një hap e gjysmë, duke theksuar se kompania nuk pranoi drejtpërdrejt shqetësimet në lidhje me teknologjinë dhe as nuk ndaloi shitjen e softuereve në zyrat federale të zbatimit të ligjit. Pushimi është një “fillim i shkëlqyeshëm”, shkroi një punonjës në një faqe të brendshme të Amazon-it. Por qëllimi, sipas tij, duhet të jetë më i gjerë, për të siguruar që produktet e Amazon-it “nuk janë në kundërshtim me promovimin e gjithëpërfshirjes, diversitetit dhe përjetësimin e paragjykimeve dhe padrejtësive ndaj komuniteteve me ngjyrë.”
Punonjësit dhe disa aksionerë kanë kohë që janë ankuar për mungesën e diversitetit në ekipin e lartë drejtues të Bezos, një grup i njohur si “S-Team” që ka 22 drejtues (asnjë prej të cilëve nuk është me ngjyrë). Në një bashki të qytetit në 2017-n, një punonjës e pyeti Bezon për mungesën e diversitetit në ekipin e tij. Bezos u përgjigj duke thënë se ekipi ishte kompakt prej vitesh, dhe se e shihte këtë si një pasuri.
Në prill, para se George Floyd të vritej, në paraburgimin e policisë në Minneapolis, një grup i punonjësish i shkruajti Bezos dhe ekipit të tij të vjetër, duke thënë se ekziston “një model sistematik i paragjykimit racor që përshkon Amazon-in”, sipas e-mail-eve të shikuara nga gazeta prestigjioze New York Times.
Ata deklaruan se u nxitën pasi David Zapolsky, këshilltari i përgjithshëm i Amazon-it, i cilësoi punonjësit me ngjyrë në depot e Staten Island si “jo të zgjuar dhe të artikuluar”. Punonjësit gjithashtu shtuan se “nuk ishte një incident i izoluar, por më tepër një simptomë e një problemi më të madh.” Ata thanë se Amazon adoptoi racizmin e ngulitur që pllakosi Amerikën, e dëshmuar nga “homogjeniteti” i udhëheqjes së tij në krahasim me “diversitetin e pasur racor dhe etik midis popullatës tonë punëtore”.
Grupi propozoi gati një duzinë ndryshimesh specifike, duke përfshirë kryerjen e një kontrolli të paragjykimit të palëve të treta, lëshimin e shifrave të hollësishme mbi garën dhe promovimet, dhe vendosjen e qëllimeve për përfaqësim në rolet e menaxhimit dhe drejtimit.
Amazon tha se drejtuesit e lartë ofruan burime për të ndihmuar grupin të zhvillojë sugjerimet e tyre në një propozim zyrtar.Të martën, Microsoft, një nga konkurrentët më të mirë të Amazon-it, tha se do të shpenzojë 150 milionë dollarë në përpjekjet e diversitetit dhe planifikoi të dyfishojë numrin e menaxherëve me ngjyrë dhe punonjësve të vjetër deri në vitin 2025.
Javët e fundit, ekipi drejtues i Bezos ka mbajtur “qarqe dëgjimi” me punonjës me ngjyrë, dhe shumë drejtues të Amazon-it kanë shkruar e-maile personale në departamentet e tyre. Disa ekipe janë larguar nga termat e njëanshëm teknik, duke përdorur fraza si “listat e zeza” dhe “listat e bardha” për të mundësuar aksesin në rrjet, sipas një e-mail-i të përbashkët midis disa punonjësve. Punonjësit duket se duan të bëhen më shumë në numër.
Ata kanë bashkëpunuar në një dokument për të propozuar që Amazon ta bëjë diversitetin një “parim të ri udhëheqjeje”. Në dokument, dhjetëra të punësuar cituan në mënyrë anonime përvojat e diskriminimit në ndërveprimet e përditshme të punës. Në depon ku punon Williams dhe pjesa më e madhe e punonjësve me ngjyrë të Amazon-it, shqetësimet e disa punëtorëve mund të jenë edhe më të qarta. Corina, në ankesën e tij të paraqitur në Kaliforni për diskriminim, tha se Amazon vazhdimisht dështoi t’u përgjigjet në mënyrë korrekte grafiteve raciste në banjot e depove.
E përfshirë në degën lokale të Shoqatës Kombëtare për Përparimin e Njerëzve me Ngjyrë, Corina tha se që nga nëntori ka raportuar vazhdimisht grafitë raciste dhe se gjuha vizuale u përkeqësua ndjeshëm pas vdekjes së Floyd-it. Disa përdorën epitete racore për të shprehur urrejtjen ndaj njerëzve me ngjyrë dhe tha se ata duhet të kthehen në Afrikë.
Corina bëri me dije se Amazon nuk u ishte drejtuar punonjësve të depove për t’u thënë se një sjellje e tillë është e papranueshme. Më tej, tha se nuk kishte parë prova për ndonjë hetim të mundshëm nga Amazon për autorët e grafiteve.
“Nuk është një medis i sigurt për një person me ngjyrë”, tha Corina duke iu referuar kompanisë teknologjike.
Në një tjetër ankesë të paraqitur javën e kaluar nga një agjenci e punësimit në Kaliforni, një kontraktues me ngjyrë pretendon se u pushua nga puna në fillim të qershorit, sepse Amazon mendoi se kishte marrë një foto të grafiteve të reja raciste që një koleg i postoi në twitter.
Kontraktori, Donald Archie II, u shpreh se Amazon nuk ishte përpjekur të zbulonte kush i kishte shkruar fjalët raciste. Ndërkohë Amazon thotë se hetimet kanë nisur në fillim të muajit, dhe se Archie u hoq nga kompania për të mos përshkallëzuar shqetësimet në lidhje me mbishkrimet.
Më 16 qershor, një koleg i dërgoi Archie-t një foto nga banjo, me fraza raciste të shkruara në mur.
Më poshtë ishte një gazetë e brendshme që citonte deklaratën publike të Amazon-it më 31 maj: Trajtimi i pabarabartë dhe brutal i njerëzve me ngjyrë në vendin tonë duhet të ndalojë.
Nga Alessia Selimi
