Gjatë fjalës së tij nga foltorja e Kuvendit ditën e sotme kryeministri e Edi Rama ka renditur edhe arsyet pse është kundër listave të hapura.
Ai ka theksuar se vendit tonë i duhet një afat i gjatë kohor për të bërë numërimet e votave me listat e mbyllura, ndërsa ka shtuar se listat e hapura e vështirësojnë akoma më shumë këtë proces.
“Ju e dini të gjithë mendimin tim për listat e hapura. Unë mendoj që listat e hapura e ndërlikojnë akoma më shumë procesin e votimit. Më e pakta që mund të thuhet është që ajo mënyrë vendimi nuk është e lehtë. Po t’i kthehemi pak kohës dhe të shohim sa zgjat numërimi sot me lista të mbyllura dhe nuk e di se sa mund të dojë një numërim me këto lista. Opinioni publik sot ka një bindje të përgjithshme që listat e hapura janë një zgjidhje e madhe për demokratizimin e përfaqësimit. Është shumë e vërtetë që listat e mbyllura sot shihen si kasaforta e të gjithë të këqijave të pazbuluara dhe të gjithë besojnë se po u hapën listat, partitë nuk do të kenë kryetar, por kjo nuk është e vërtetë.”-tha ai.
Ndërsa ka renditur kërkesat e opozitës parlamentare për finalizimin e Reformës Zgjedhore, kreu i Qeverisë theksoi se mos lejimi i Partisë Demokratike dhe kryetarit të saj Lulzim Bashës në komisione, do e bëjë këtë të fundit që të nxehet e më pas të mos marrë pjesë në zgjedhje.
“Ne nuk jemi në kushtet kur kemi bërë ndonjë martesë, që ta dish ti Myslim që e vuan shumë martesën time me Lulin, po nuk është e vërtetët. Po një krushqi e kemi në fakt siç e kemi dhe me ju, që ka të bëjë me përmbushjen e një kushti që nënkupton një produkt me standarde dhe që mundësisht të krijojë një klimë më të madhe besimi mes palëve. Nëse ju më thoni se ne duam listat e hapura, heqjen e koalicioneve dhe ne duam që Partia Demokratike dhe Lulzim Basha të mos kenë njerëz në komisione, atëherë i bie ta tmerrojmë Lulin nga e para, ta kthejmë atë lepurin në formë luani të madh në një mace, atëherë i bie ta bëjmë atë të mos hyjë në zgjedhje.”- u shpreh ndër të tjera Edi Rama.ka.ta/Fjala.al/
