Novak Gjokoviçi i është rikthyer stërvitjes pasi përfundoi dy javë karantinë, pasi doli pozitiv me virusin korona, në përfundim të turneut “Adria Tour”. Tenisti serb, numri një në botë, u rikthye në fushë së bashku me bashkatdhetarin e tij, Viktor Troicki, i cili gjithashtu u infektua gjatë turneut në fjalë.
Nga asaj që raporton faqja serbe e lajmeve në Internet, “Telegraf”, Gjokoviçi është mërzitur shumë nga kritikat që ka marrë javët e fundit për shkak të festimeve në “Adria Tour”, pa marrë asnjë masë kundër virusit korona, ku edhe u infektuan 6 nga tenistët pjesëmarrës në të, përfshirë edhe atë vetë.
“Kam parë shumë kritika dashakeqe, – ka deklaruar ai, për median serbe në fjalë. – Unë mendoj se prapa ka diçka më shumë se sa kritikat, duket si një gjueti shtrigash. Duket sikur dikush kërkon patjetër një emër për të më portretizuar mua si fajtorin kryesor të gjithçkaje.”
Përtej kësaj, Gjokoviçi ishte përsëri skeptik në lidhje me faktin nëse do të luajë apo jo në Turneun e Hapur Amerikan të Tenisit (US Open). Megjithatë, ai e ka konfirmuar praninë e tij në turnetë që do të zhvillohen në Evropë. “Nuk jam i sigurt nëse do të luaj në turneun amerikan”, – ka thënë ai.
“Unë kam në plan të luaj në Madrid, Romë dhe “Roland Garros” në shtator”, – ka përfunduar tenisti serb, Novak Gjokoviç.
la.mi/Fjala.al
