Rikthehet në stol pas 3 vitesh mungesë, me të do të jetë edhe ish-kapiteni kuqezi, Ansi Agolli. E kishte pohuar edhe nëpër intervista se, me kalimin e epidemisë së virusit korona, do ta shikonim në stolin e një përfaqësueseje evropiane. Dhe kështu ka ndodhur, teksa Xhovani De Biazi i është kthyer detyrës së trajnerit pas gati 3 vitesh. Ish-trajneri i Shqipërisë do të drejtojë përfaqësuesen e Azerbajxhanit.
Lajmi është konfirmuar tashmë në mediat italiane, ndërsa emërimi i tij në krye të kombëtares azere u paralajmëruar gjatë pasdites po nga mediat italiane. Interesant është fakti se në stolin e kësaj përfaqësueseje, do të jetë edhe një “ish” i Kombëtares kuqezi, ish-futbollisti Ansi Agolli. Duhet theksuar që që Xhovani De Biazi mban dhe pasaportën shqiptare.
Dhe mund të themi tashmë se dy shqiptarë do të drejtojnë në vijim Azerbajxhanin. 64-vjeçari De Biazi ishte trajneri që hyri në historinë e futbollit shqiptar, duke arritur t’i drejtonte kuqezinjtë drejt kualifikimit për herë të parë, në fazën finale një veprimtarie ndërkombëtare, siç ishte Euro 2016-ta në Francë. Italiani qëndroi 6 vite në krye të stolit të Shqipërisë, duke arritur bilancin më të mirë me skuadrën shqiptare.
Ndërkaq, ish-kapiteni i Shqipërisë Agolli kthehet në Azerbajxhan, vend ku kaloi vitet më të mira të karrierës së tij. Ai luajti plot 8 vite me Karabakun duke fituar 5 kampionate dhe 3 Kupa të Azerbajxhanit. Ai arriti të luante me këtë ekip edhe në Ligën e Kampioneve dhe atë të Evropës.
la.mi/Fjala.al
