E vetmja e mbijetuar e ngjarjes së rëndë në Kombinat, 5 vite më parë është trajtuar nga një psikiatër, pasi vuante nga depresioni.
Mësohet se vizitën e parë te mjeku psikiatër ajo e ka bërë në 11 mars të vititit 2015. Sipas mjekut që e ka trajtuar të renë, ajo ka vuajtur nga çrregullimi depresiv, i cili më pas ka kaluar në çrregullim depresiv psikotik.
Blerta ka kaluar në depresion, si pasojë e çrregullimeve që ka pasur me ankthin.
Mësohet se në këtë periudhë e reja ka shkuar me motrën e saj, Anisën te psikiatri dhe aty ka kryer 4 vizita. Pas trajtimit dhe kurave që mori, gjendja e saj u qetësua.
Mjeku që trajtoi 34-vjeçaren thotë se pas një viti gjendja e saj u normalizua dhe nuk përdorte më as qetësues. Blerta është dëshmitarja e vetme, e cila pritet të hedhë dritë mbi ngjarjen e rëndë të Kombinatit. Në dëshminë paraprake që ka dhënë përpara grupit hetimor, 34-vjeçarja ka treguar se trupi i motrës së saj është mbajtur në banesë nga ajo dhe nëna e saj prej gati 15 muajsh.
Ajo ka treguar se motra e saj ka humbur jetën më 27 mars të vitit 2019, dhe se ajo bashkë me nënën e kanë mbajtur të fshehtë, pasi besonin në Zot dhe se Anisa do të ringjallej, nëse ato do të bënin sakrifica.
Blerta u ka thënë hetuesve se motra e saj ka pasur edhe kriza nervore, por ajo dhe nëna e saj nuk e kishin dërguar asnjëherë në spital./Fjala.al/Ke.Ba
