Kukësi përballet në ndeshjen e kthimit të gjysmëfinaleve të Kupës së Shqipërisë me Teutën dhe trajneri Orges Shehi është i qartë në atë që kërkon nga skuadra.
“Ça presim? Ne e dimë që është një përballje gjysmëfinaleje, kemi parasysh rezultatin e ndeshjes së parë dhe kështu që e dimë se për çfarë shkojmë atje”, – ka deklaruar ai.
“E dimë që është një ndeshje e vështirë dhe presim të japim atë që kemi dhënë gjithmonë, maksimumin”, – ka shtuar trajneri durrsak, i cili thekson se, përtej fitores 3-0 ndaj Teutës në kampionat, përballjet e Kupës, atje ku dueli i parë i gjysmëfinales midis këtyre dy skuadrave është mbyllur me rrjeta të paprekura, janë krejt tjetër gjë. “Sigurisht që Kupa ka specifikë të veçantë”, – thotë ish-portieri.
“Është një përballje me dy takime dhe, siç e thashë edhe më sipër, duke e ditur rezultatin e ndeshjes së parë, je i qartë se çfarë pritet në ndeshjen e dytë, se çfarë rezultati kërkohet, – ka theksuar Shehi. – Është një rezultat, 0-0, që ndoshta na jep atë kënaqësinë që nuk kemi pësuar gol, por duhet të bëjmë mirë atje, sepse gjithçka është e hapur sa i përket kualifikimit.”
42-vjeçari e pohon se lodhja po bën të vetën tek futbollistët. “Sa i përket gjendjes fizike, normalisht mund të ketë pak lodhje, sepse po luajmë në një periudhë anormale, – ka këmbëngulur ai. – Ne të gjitha analizat dhe bisedat i bëjmë sikur është një periudhë normale, por nuk jemi në kushte normale, anormale, sepse të luash çdo 3 ditë dhe në këtë situatë, të gjithë futbollistët janë heronj.”
“Kështu që do të bëjmë maksimumin për ta freskuar sadopak skuadrën, për të qenë në formë sa më optimale të mërkurën”, – ka shtuar Shehi, i cili nuk ka preferenca për kundështarin e mundshëm në një finale eventuale. “Ne jemi të fokusuar vetëm tek ekipi ynë, – ka thënë trajneri i verilindorëve. – Objektivi ynë është që të shkojmë në finale, kështu që pak rëndësi ka se kush do të jetë kundërshtari ynë atje.”
Takimi Teuta-Kukës luhet të mërkurën, duke nisur nga ora 20:45, në Stadiumin “Niko Dovana” të Durrësit./Fjala.al
