Ish-futbollisti i kombëtares shqiptare të futbollit Igli Tare feston sot përvjetorin e 47-të të lindjes. Drejtori Sportiv i skuadrës së Lazios është një nga emrat më të suksesshëm të futbollit shqiptar.
Ai ka luajtur me një sërë skuadrash shqiptare e të huaja duke filluar që nga Partizani për të vijuar më pas me emra të mëdhenj si Fortuna Düsseldorf, Brescia, Bolognia e në fund e mbylli karrierën e tij si futbollist aktiv te skuadra që tashmë është drejtor.
Tare ka qenë një nga sulmuesit më të rëndësishëm të kombëtares kuqezi për një periudhë të gjatë dhe emri i tij është i gdhendur fort në historinë e futbollit të vendit tonë.
Pasi mbylli fazën si lojtar aktiv, Igli Tares iu propozua posti i Drejtorit Sportiv te të kaltrit e Italisë nga Presidenti Claudio Lotito.
Edhe në këtë pozicion shqiptari ka treguar se është nga më të mirët, duke sjellë talente premtuese te Lazio dhe duke e ngritur në nivel aq të lartë, duke konkurruar fortë në Serinë A.
Afrimet e lojtarëve me shifra të ulëta dhe kthimi i tyre në disa prej emrave më të mirë në futbollin Italian, kanë treguar aftësinë e Igli Tares për të dalluar talentet.
Rrugëtimi i tij cilësohet me plot gojë si një histori suksesi, pasi ende ai vijon të shkëlqejë mes më të mirëve, ndonëse tashmë në një pozicion tjetër në klub.ka.ta/Fjala.al/
