Nga shpërthimi tragjik i ndodhur dje në Liban janë shënuar 78 viktima dhe mbi 4 mijë të plagosur.
Një bilanc tragjik, pas atyre pamjeve dramatike, ku shiheshin njerëz duke fluturuar dhe më pas një qytet i rrënuar.
Shumë ndërtesa janë shkatërruar. Pamjet nga Bejruti po konsiderohen të ngjashme me ato nga shpërthimi atomik në Hiroshima.
Shpërthimi shkaktoi shembje të ndërtesave, thyerje të xhamave dhe dëmtime të tjera materiale. Sakaq shkaktoi edhe një re të madhe pluhuri dhe tymi.
Me të plagosurit që ende shkojnë nëpër spitale dhe kërkimet e personave të zhdukur që po vazhdojnë, shifrat kanë të ngjarë të shkonin më të larta.
Sekretari i Përgjithshëm i partisë Kataeb, Nizar Najarian, u vra në shpërthim, dhe në mesin e të plagosurve ishte edhe Kamal Hayek, kryetari i ndërmarrjes shtetërore të energjisë elektrike, i cili është në gjendje kritike.
Agjensia shtetërore e lajmeve në Liban NNA tha se shpërthimi ndodhi në zonën e portit të Bejrutit, ku ka depo me eksplozivë. Nuk është e qartë menjëherë se çfarë e shkaktoi shpërthimin ose çfarë lloj eksplozivi ndodhej në depo.
Ministri i Shëndetësisë në Liban tha se ka një “numër shumë të lartë” të lëndimeve dhe dëme të mëdha.
Ndërkohë Presidenti i vendit Michel Aoun ka shpallur dhe gjendjen e jashtëzakonshme./Bl.Ba/Fjala.al
