Policia e Tiranës mesditën e sotme ka vënë në pranga të shumëkërkuarin Aterio Kaloshin, i cili jetonte me Orgest Bilbilin, në një apartament në zonën e Brrylit.
Arrestimi i tij u bë i mundur gjatë një aksioni të ndërmarrë nga policia në Qesarkë.
Kaloshi u arrestua së bashku me Meardi Berberin, person i shpallur në kërkim si një nga autorët e ngjarjes për atentatin e ndodhur në hotel “Volorek”, mëngjesin e 8 gushtit. Sipas informacioneve mësohet se gjatë këtij operacioni dy të arrestuarve i ka sekuestruar edhe armë.
Kaloshi i shpëtoi policisë mesditën e 10 prillit ku në pranga u vu shoku i tij, Orgest Bilbili, i cili po lëvizte me kapuç në kokë gjatë periudhës së izolimit. Polici e ndoqi dhe më pas e qëlloi me plumb në këmbë për ta neutralizuar, duke bërë më pas të mundur edhe arrestimin e tij.
Kaloshi, i cili jetonte në një apartament me Bilbilin arriti t’ia mbathë. Policia gjeti në shtëpinë e marrë me qira me firmën e Jurgena Xh., e dashura e Anterio Kaloshit një pasaportë të këtij të fundit, 900 euro si edhe një armë që dyshohet se i përkiste Kaloshit.
Sipas policisë dy të arrestuarit dyshohet se janë pjesë e një grupi të rrezikshëm kriminal. Dy të rinjtë dyshohet se kanë marrë pjesë në disa ngjarje të rënda kriminale që kanë tronditur vendin vitet e fundit.
