Pediatrja e njohur, Lira Gjika përmes një statusi në Facebook u kërkon prindërve që të jenë të kujdejsshëm me fëmijët, por jo ta teprojnë me kujdesin e tyre.
Pasi sipas saj, nga kujdesi i tepërt i pengojmë fëmijët të zhvillojnë reflekset e duhura për mbrojtjen.
Statusi i plotë i pediatres Lira Gjika
“Vishe se do sëmuret”, “vishe se do të ftohet”, “ushqeje me zor se do dobsohet” “mos e lër të hipi te shkallët se do rrëzohet”, “mos e lër të hipi në biçikletë se do e shtypi makina”, “mos e lër të luaj me ujë se do ftohet” dhe nuk kanë fund kufizimet e fëmijëve.
Edukimi ynë karakterizohet nga frika dhe paaftësia për të menduar se cili veprim apo sjellje, është më e mirë për fëmijn. Pikërisht kjo frikë dhe paaftësi, krijon atë konfuzion që e bën të rriturin të paaftë të ketë kurajo ta nxitë fëmijën të besojë se mund ti bëjë vetë gjërat, pasi nuk është vetëm, por ka të rriturin pranë.
Padashur i pengojmë të zhvillojnë reflekset e duhura për mbrojtjen, për tu rritur e njohur vetë mjedisin. Me këtë lloj pseudo përkujdesje vetëm i pengojmë të fitojnë atë lloj zhdërvjelltësie si fizike e psikoemocionale që jep eksplorimi dhe arritja e një veprimi të bërë vetë.
Mbasi i kemi penguar sa mundim, fillon faza e dytë, etiketimi: “ky mi, ky është I ngordhur”, ky apo kjo është një frikacak apo frikacake e paparë” ky apo kjo është qullac” “ këtë e kalojnë të gjithë” dhe për ta mbyllur, sikur nuk mjaftojnë të gjitha këto epitete, fillojmë e qeshim madje edhe në sy të fëmijës. Të rritur, nëse pretendoni që fëmijët të bëhen të rritur të zot, kurajozë e të përgjegjshëm, shmangini këto lloj sjelljesh që vetëm dëm bëjnë.
