Autobusët kanë lënë në rrugë qytetarët duke i zbritur nga mjetet edhe pse ato ndodhen me kilometra larg pikës kufitare të Kakavijës për të kaluar në territorin grek.
Qytetarët janë zbritur nga autobusët dhe janë detyruar të marrin në krah çantat dhe valixhet e tyre të udhëtimit dhe të nisen në këmbë drejt pikës së kalimit kufitar.
Shkak për këtë është bërë aksidenti tragjik i ndodhur në fshatin Bularat, ku policia ka bllokuar zonën për inspektimin e vendngjarjes së aksidentit, duke mos lejuar më kalimin e mjeteve.
Qytetarët do të bëjnë me dhjetëra kilometra rrugë në këmbë në temperatura të larta, pasi radha e mjeteve ka shkuar në 25 km deri në fshatin Grapsh.
Ndërkohë Drejtori i AKMC, Haki Çako ndodhet në Kakavijë për shkak të situatës së krijuar bashkë me 200 efektivët e Forcave të Armatosura që prej mbrëmjes së djeshme në Kakavijë.
Efektivët e FA nga Tirana, Berati dhe Gjirokastra kanë shpërndarë e vazhdojnë të furnizojnë qytetarët me ujë e ushqime. 1.5 mijë litra ujë e qindra paketa ushqimesh vijojnë të shpërndahen që nga dita e djeshme./Bl.Ba/Fjala.al
