Presidenti Ilir Meta bën përgjegjës qeverinë shqiptare për situatën e rëndë që kaluan qytetarët në pikën kufitare të Kakvijës ku prej ditësh qëndruan në rrugë në pritje për të hyrë në shtetin fqinj, Greqinë.
Gjatë konferencës së përjavshme me gazetarët, Meta tha se qeveria gjen justifikime dhe e drejton gishtin nga ana tjetër e kufirit.
“Ashtu siç ka ndodhur shpeshherë, Qeveria gjen justifikime duke e drejtuar gishtin nga ana tjetër e kufirit, ndërkohë që është përgjegjësia e saj parësore që të marrë masat dhe të kujdeset për shtetasit e saj.
Çfarë informacioni dhe sqarimi u është dhënë njerëzve që lëvizin jashtë vendit, dhe në mënyrë të veçantë atyre për në Greqi. A ka patur ndonjë njoftim zyrtar nga MEPJ për kuotës e leje kalimit prej 750 vetësh në ditë. Përgjegjësia është vetëm e qeverisë shqiptare”, shprehet Meta.
Më tej në emër të shteti shqiptar Meta u ka kërkuar falje qytetarëve për momentet e vështira që kaluan në pikat e kalimit kufitar.
“Kërkoj ndjesë në emër të shtetit shqiptar për të gjithë qytetarët që për ditë të tëra kaluan momente tepër të vështira në pikat e kalimit kufitar me Greqinë”, tha ai./Bl.Ba/Fjala.al
